“ህወሓት ህዝብን በመከፋፈል የራሱን ስልጣን ለማራዘም የሚንቀሳቀስ ነው”- አቶ ነቢዩ ስሁል

Source: https://ethiothinkthank.com/2020/06/03/prosperity-party-nebyu-sehul/

የትግራይ ብልጽግና ፓርቲ ጽ/ቤት ሃላፊ አቶ ነቢዩ ስሁል እንዳሉት ”ህወሓት ህዝብን በመከፋፈል ሰዎችን በማጥቃትና ተገዳዳሪ ሃሳብን በመጨፍለቅ የራሱን ስልጣን ለማራዘም የሚንቀሳቀስ ነው”።

በህዝባዊ ወያኔ ሓርነት ትግራይ (ህወሓት) አገዛዝ የተነሳ የትግራይ ህዝብ አማራጭ የፖለቲካ ሃሳብ እንዳያንጸባርቅ ተደርጓልም ብለዋል የፓርቲው ጽህፈት ቤት ኃላፊ።

የፓርቲው ጽህፈት ቤት ኃላፊ አቶ ነቢዩ ስሁል ለኢዜአ እንደገለጹት፤ የህወሓት አገዛዝ በዘር ፖለቲካ ውስጥ “የተነከረ” ህዝብን በመከፋፈልና ሰዎችን በማጥቃት ላይ የተመሰረተ ነው።

የትግራይ ህዝብ በህወሓት ምክንያት አማራጭ የፖለቲካ ሃሳብ እንዳያንጸባርቅ ጫና እየተደረገበት እንደሚገኝ የተናገሩት አቶ ነብዩ፤ ”ህዝቡ አማራጭ ሃሳብ ሊቀርብለት ይገባል” ሲሉም ገልጸዋል።

የብልጽግና ፓርቲ ይህ እውን እንዲሆን፣ ህዝቡ አማራጭ የፖለቲካ ሃሳብ እንዲኖረውና ዴሞክራሲ እንዲሰፍን እየሰራ እንደሚገኝ አመልክተዋል።

”ህወሓት ህዝብን በመከፋፈል ሰዎችን በማጥቃትና ተገዳዳሪ ሃሳብን በመጨፍለቅ የራሱን ስልጣን ለማራዘም የሚንቀሳቀስ ነው” ብለዋል።

“ህወሃት ህዝብን እስከ መንደር ድረስ በመከፋፈል ጸረ-አንድነት አቋም ያለው ጠባብ ሃይል ነው” ያሉት አቶ ነቢዩ፤ “ህዝብን በመከፋፈል ለአገዛዙ ምቹ ሁኔታ በመፍጠር የቡድናዊ ጥቅሙን ለማርካት ይንቀሳቀሳል” ብለዋል።

“የህወሓት አገዛዝ በሂደት ተለውጦ ዴሞክራሲያዊ ይሆናል” የሚል እምነት በህዝቡ ውስጥ እንደነበረ ያወሱት አቶ ነብዩ፤ በአሁኑ ወቅት በአገዛዙ ላይ ተስፋ የቆረጠው ህዝብ እምቢተኝነቱን እየገለጸ ነው ብለዋል።

በአፈና የሚያምነው የህወሓት ቡድን በትግራይ እየተቀጣጠለ ያለውን ህዝባዊ እምቢተኝነት ለማፈን እየሰራ መሆኑንም አመልክተው፤ ይህም ቢሆን ግን ህዝቡ ማሸነፉ አይቀሬ ነው ሲሉ ገልጸዋል።

የህወሓት ማዕከላዊ ኮሚቴ ከሰሞኑ ያወጣው መግለጫ ከህዝብ ጥቅም ጋር የሚጋጭና ስልጣንን ለማራዘም የተደረገ መፍጨርጨር እንደሆነ የገለጹት አቶ ነቢዩ፤ ”መግለጫው የቡድኑ ተስፋ መቁረጥ ማሳያ ነው” ብለዋል።

ብልጽግና ፓርቲን በአምባገነንነት መክሰስ ከሞራልም ሆነ ከሌሎች መርሆች አንጻር ሲታይ ቡድኑ የከፋ ተስፋ መቁረጥ ውስጥ መግባቱን የሚያሳይ ነው ሲሉም ተናግረዋል።

”ህወሓት ስለአምባገነንነት አንስቶ ሌላውን ለመንቀፍ አንዳችም የሞራል ልዕልና የለውም” ያሉት የፓርቲው ጽህፈት ቤት ሃላፊ፤ ”ትልቁ የአምባገነን ስርዓት የህወሓት ስርአት ነው” ብለዋል።

የህወሓት አገዛዝ በኢትዮጵያ ያለውን የልማት፣ የዴሞክራሲና የመልካም አስተዳደር ግንባታ የሚያደናቅፍ ቡድን እንደሆነ የተናገሩት አቶ ነቢዩ፤ የኢትዮጵያ ህዝብ ይህንን ኃይል ለመዋጋት የሚደረገውን ትግል እንዲያግዝ ጥሪ አቅርበዋል።

የትግራይ ብልጽግና ፓርቲ ትናንት ባወጣው መግለጫ “የህወሓት አኩራፊዎች የግል ፍላጎታቸውን ለማስቀጠል ያልተቋረጠ ሴራ እየጎነጎኑ ነው” በማለት ማመልከቱ ይታወቃል።

ምንጭ፦ ኢፕድ

Share this post

Post Comment

This site uses Akismet to reduce spam. Learn how your comment data is processed.