ለጀርባ ህመም የሚዳርጉን የየእለት ተግባራት…

Source: http://www.yegnagudday.com/2018/01/12/%E1%88%88%E1%8C%80%E1%88%AD%E1%89%A3-%E1%88%85%E1%88%98%E1%88%9D-%E1%8B%A8%E1%88%9A%E1%8B%B3%E1%88%AD%E1%8C%89%E1%8A%95-%E1%8B%A8%E1%8B%A8%E1%8A%A5%E1%88%88%E1%89%B5-%E1%89%B0%E1%8C%8D%E1%89%A3/

አዲስ አበባ፣ ጥር 3፣ 2010 (ኤፍ.ቢ.ሲ) የጀርባ ህመም በአሁኑ ጊዜ በዓለም ዙሪያ በርካታ ሰዎችን እያጠቃ ሲሆን፥ በቅርብ የተሰራ ጥናት ደግሞ ከዓለም ህዝብ ውስጥ ግማሽ ያክሉ በጀርባ ህመም እንደተጠቃ ያመለክታል።

በቅርቡ በአሜሪካ በ2 ሺህ ሰዎች ላይ በተሰራ የዳሰሳ ጥናትም በጥናቱ ላይ ከተሳተፉት ውስጥ 52 በመቶዎቹ ለጀርባ ህመም እንደተጋለጡ ተለይቷል።

የጀርባ ህመም በተለያዩ አጋጣሚዎች ሊከሰትብን የሚችል ሲሆን፥ ቀጥለው የተዘረዘሩት ደግሞ በእለት ተእለት እንቅስቃሴያችን ውስጥ ለጀርባ ህመም እንድንጋለጥ የሚያደርጉን ምክንያቶች ናቸው።

1. የሞባይል ስልክ መጠቀም

የሞባይል ስልክም ቆመን ይሁን ተቀምጠን በምንጠቀምበት ጊዜ በብዛት ከደረታችን በታች ዝቅ አደርገን የምንይዝ ሲሆን፥ በዚሁ ጊዜ ሞባይሉን ለመመልከት ዝቅ ማለት ይጠበቅብናል።

በዚህ ጊዜም የላይኛው የጀርባችን ክፍል እና አንገታችን በቀላሉ ለህመም ሊጋለጥ ይችላል ተብሏል።

2. ጥርስ መቦረሽ እና ሳሀን ማጠብ

ጥርሳችንን ስንቦርሽ አሊያም እቃ በምንጥብበት ጊዜ የመታጠቢያውን አሊያም የእቃ ማጠቢያ ሲንኩን ለመጠቀም በተደጋጋሚ የምናጎነብስ ሲሆን፥ ይህ ደግሞ በታችኛው የጀርባችን ክፍል፣ በአንገታችን እና በትክሻችን ላይ ህመም እንዲከሰት ያደርጋል።

በዚህ መልኩ በጀርባችን ላይ የሚከሰትን ህመም ለመቀነስ አጎንብሰን እቃ ስናጥብም ይሆን ጥርሳችንን ስንቦርሽ አንድ እግራችንን የምንሰቅልበት አጠር ያለ ነገር አስቀምጠን መጠቀም በጀርባችን ላይ የሚፈጠረውን ጫና ለመቀነስ ይረዳል።

3. ቤት ማፅዳት

ቤት በምናፀዳበት ጊዜ ከወገባችን ጎበጥ ብለን መጥረጊያ አሊያም መወልወያችንን ወደ ፊት እና ወደ ኋላ እየመለስን ሙሉ ሰውነታችነን አብረን የምናንቀሳቅስ ከሆነ የላይኛው እና የታችኛው የጀርባችን ክፍል ላይ ጫና በመፍጠር ህመም ሊያክተልበን ይችላል።

ስለዚህ ቤት በምናፀዳበት ጊዜ ጀርባችን ቀጥ እንዳለ እጃችንን ብቻ በማንቀሳስ መጥረጊያ አሊያም መወልወያችንን በመጠቀም ማፅዳት ያለብን ሲሆን፥ በመሃል እረፍት መውሰድ እና ሌሎች እንዲያግዙን ማድረግም መልካም ነው።

4. ክብደት ያላቸውን ነገሮች ተሸክሞ ደረጃ መውጣትና መውረድ እንዲሁም ተንጠራርቶ መስቀል

ክብደት ያላቸው ነገሮችን ከወገባችን ጎበጥ ብለን እያወዛወዝን ደረጃ ላይ ይዞ መውጣትና መውረድ እንዲሁም ከፍ ያለ ቦታ ላይ ለመስቀል መሞከር የላይኛውና የታችኛውን የጀርባ ክፍል ጨምሮ በትክሻን ላይ ህመም እንዲከሰት ያደርጋል።

ይህንን ችግር ለመከላከልም የምንሸከመውን እቃ ወደራሳችን በደንብ አስጠግተን መያዝ፣ ከጀርባችን ቀጥ ማለት እንዲሁም በምንቀሳቀስበት ሰዓት ከጀርባችን እና ከትክሻን ሳይሆን ከእግራችን ማድረግ።

እንዲሁም አንድ ጊዜ ሞክረን ለማንሳት የከበደንን ነገር መልሶ ማንሳትን ማሰብ የለብንም፤ ይልቁንም በአካባቢያችን ያለ ሰው እንዲያግዘን ማድረግ መልካም ነው።

5. አልጋ ማንጠፍ

አልጋ በምናነጥፍበት ጊዜ የአልጋውን ሁሉንም ጫፍ ለማዳረስ በምናደርገው ጥረት ውስጥ በጣም ከጎበጥን ለጀርባ ህመም እንድንጋለጥ ያደርጋል።

ለዚህ ችግር እንዳንጋለጥም ከወገባችን ከማጉበጥ ይልቅ ከጉልበታችን ሸብረክ ማለት እና ወገባችንን ቀጥ ማድረግ፤ እንዲሁም በአካባቢያችን ላይ ሰዎች ካሉ እንዲያግዙን ማድረግ ይመከራል።

6. ቴሌቪዥን መመልከት

በርካቶቻችን ለረጅም ሰዓት ተቀምጦ ቴሌቪዥን መመልከት ችግር እንደሚያስከትልብን አናስብ ይሆናል፤ ሆኖም ግን ለረጅም ሰዓት መቀመጥ እና አቀማመጣችን ለጉዳት ሊዳርገን ይችላል።

እግራችንን አጣምረን ለረጅም ሰዓት መቀመጥ በዳሌያችን እና በጉልበታችን ላይ ጉዳት የሚያስከትል ሲሆን፥ ከጀርባችን ወደ ፊት ጎበጥ ብለን መቀመጥ ደግሞ ታችኛውን የጀርባችንን ክፍል ይጎዳል ነው የተባለው።

ስለዚህ ቴሌዚዥን ስንመለከት በየመሃሉ መቆም ወይም ያጣመርነውን እግራችንን በማለያየት ለ20 ደቂቃ መቆየት እንዲሁም ስንቀመጥ ከወገባችን ቀጥ ማለት መልካም ነው።

7.ልብስ ማጣጠፍ

ልብስ ማጠፍ በብዛት የምንከውነው ነገር ግን የጀርባ ህመምን እንደሚያስከትል የማናውቀ ተግባር ነው።

ልብስ በምናጣጥፍበት ጊዜ አጠር ያለ ነገር የምንጠቀም ከሆነ ለኢያም ተቀምጠን ፊትለፊታችን ያለ ጠረጴዛ ላይ ጎንበስ ብለን የምናጣጥፍ ከሆነ በቀላሉ ጀርባችን ላይ ህመም እንዲከሰት ያደርጋል።

ስለዚህ ቆመን የምናጣጥፍ ከሆነ ከፍ ያለ ጠረጴዛ መጠቀም፤ ተቀምጠን የምናጣጥፍ ከሆነ ደግሞ ከጀርባችን ቀጥ በማለት አቀማመጣችንን ማስተካከል ይመከራል።

ምንጭ፦ www.dailymail.co.uk

Share this post

Post Comment