ምክትል ከንቲባ ኢ/ር ታከለ የዩኒፎርም፣ የትምህርት ቁሳቁስና የምገባ ድጋፍ እንዲደረግ ላበረከቱት አስተዋፅኦ ተሸለሙ

Source: https://fanabc.com/2019/12/%E1%88%9D%E1%8A%AD%E1%89%B5%E1%88%8D-%E1%8A%A8%E1%8A%95%E1%89%B2%E1%89%A3-%E1%8A%A2-%E1%88%AD-%E1%89%B3%E1%8A%A8%E1%88%88-%E1%8B%A8%E1%8B%A9%E1%8A%92%E1%8D%8E%E1%88%AD%E1%88%9D%E1%8D%A3-%E1%8B%A8/

አዲስ አበባ ፣ ታህሳስ 4 ፣ 2012 (ኤፍ ቢ ሲ)  የአዲስ አበባ ምክትል ከንቲባ ኢንጂነር ታከለ ኡማ በከተማዋ በሚገኙ ሁሉም የመንግስት ትምህርት ቤቶች ዩኒፎርምን ጨምሮ የትምህርት ቁሳቁስ ድጋፍ እንዲደረግ እና የምገባ መርሃ ግብር በዘላቂነት እንዲተገበር ላበረከቱት አስተዋፅኦ ከከተማዋ ወጣቶች ሽልማት ተበርክቶላቸዋል፡፡

ሽልማቱ የተበረከተላቸው “እናመስግን!” በሚል በከተማው ወጣቶች በተዘጋጀው የምስጋና እና የእውቅና መርሃ ግብር ላይ ነው፡፡

የ300 ሺህ ተማሪዎች ምገባን ጨምሮ፣ ለ600 ሺህ የመንግስት ትምህርት ቤት ተማሪዎች የዩኒፎርም እና የትምህርት ቁሳቁስ አቅርቦት እንዲሁም በአስሩም ክፍለከተሞች የሚገኙ የአቅመ ደካሞችና አረጋዊያን ቤት እድሳት ላይ ላበረከቱት የላቀ አስተዋፆኦ ሽልማት እንደተበረከተላቸውም ተገልጿል፡፡

የከተማ አስተዳደሩ የተማሪዎች የምገባ ፕሮግራም ህግ እና ተቋማዊ ይዘት እንዲኖረው እና በዘላቂነት እንዲተገበር ለማስቻል ለካቢኔ የቀረበው ሃሳብ ሙሉ በሙሉ ተቀባይነት በማግኘቱ ‘የተማሪዎች የምገባ ኤጀንሲ’ እንደሚቋቋም ኢ/ር ታከለ ተናግረዋል፡፡

የኤጀንሲው መቋቋም በተያዘው የበጀት ዓመት የከተማ አስተዳደሩ በስፋት የሰራውን የተማሪዎች የምገባ ፕሮግራምን ጨምሮ የትምህርት ቁሳቁስ አቅርቦት ቀጣይነት እንዲኖረው እና ተቋማዊ እንዲሆን እንደሚረዳ ኢ/ር ታከለ ኡማ ተናግረዋል።

በመድረኩ ላይ የሰራተኛ እና ማህበራዊ ጉዳይ ሚኒስቴር ዶ/ር ኤርጎጌ ተስፋዬን ጨምሮ የፌደራልና የከተማ አስተዳደሩ ከፍተኛ የስራ ኃላፊዎች፣ የሃይማኖት አባቶች እንዲሁም የከተማው ወጣቶች ተሳታፊ መሆናቸውን ከከንቲባ ጽህፈት ቤት ያገኘነው መረጃ ይጠቁማል።

Share this post

Post Comment

This site uses Akismet to reduce spam. Learn how your comment data is processed.