በደቡብ ሱዳን ሠላም ሂደት ላይ ያተኮረ የኢጋድ የምክክር ስብሰባ ተጀመረ

Source: https://fanabc.com/2019/11/%E1%89%A0%E1%8B%B0%E1%89%A1%E1%89%A5-%E1%88%B1%E1%8B%B3%E1%8A%95-%E1%88%A0%E1%88%8B%E1%88%9D-%E1%88%82%E1%8B%B0%E1%89%B5-%E1%88%8B%E1%8B%AD-%E1%8B%AB%E1%89%B0%E1%8A%AE%E1%88%A8-%E1%8B%A8%E1%8A%A2/
አዲስ አበባ፣ ጥቅምት 29፣2012 (ኤፍ ቢ ሲ) በደቡብ ሱዳን ሠላም ሂደት ላይ ያተኮረ የኢጋድ የምክክር ስብሰባ ዛሬ ተጀመረ፡፡
 
የኢጋድ አባል ሃገራት ሚኒስትሮች ከደቡብ ሱዳን ሠላም ስምምነት ፈራሚ አካላት አመራሮች ጋር የሚያደርጉት የምክክር ስብሰባ ዛሬ በአዲስ አበባ ጀምረዋል።
 
ስብሰባውን በንግግር የከፈቱት የውጪ ጉዳይ ሚኒስቴር ሚኒስትር ዴኤታ ወይዘሮ ሂሩት ዘመነ ÷ የስብሰባው ዋና ዓላማ የስምምነቱ ፈራሚ አካላት ቀደም ሲል በተስማሙበት መሠረት በፈረንጆቹ ህዳር 12 ቀን 2019 የሽግግር መንግስት ምስረታ ቀነ ገደብ ዙሪያ ያላቸዉን ሃሳብ በማቅረብ ላይ ያተኮረ እንደሚሆን ገልጸዋል።
 
ሚኒስትር ዴኤታዋ ÷ በቅርቡ በኢንቴቤ በዩጋንዳ ፕሬዚዳንት የዌሪ ሙሴቬኒ እና የሱዳን ሉዓላዊ ምክር ቤት ፕሬዚዳንት አብዱል ፈታህ አልቡርሃን አወያይነት ፕሬዚዳንት ሳልቫ ኪር እና ዶክተር ሪያክ ማቻር መካከል የሽግግር ጊዜ ምስረታዉን በመቶ ተጨማሪ ቀናት ለማራዘም የተደረሰው ስምምነት የሚበረታታ እርምጃ መሆኑን ጠቅሰዋል፡፡
 
ስምምነቱ በሁሉም ፈራሚዎችና የሠላም ዋስትና ሠጪዎች ዘንድ ተቀባይነት እንዲያገኝ መስራት እንደሚያስፈልግ አመልክተዋል።
 
በንግግራቸው በደቡብ ሱዳን የተኩስ አቁም ስምምነቱ ፀንቶ መቆየቱ አበረታች መሆኑ ፣ሠራዊት በማሰባሰብ ወደ ካምፕ የማስገባት ሥራ መጀመሩ ፣ አፍሪካ ህብረት ፣ኢትዮጵያ ፣ግብፅ ፣ቻይናና ጃፓን በገቡት ቃል መሠረት ለካምፕ ምስረታ የሚያግዝ የቁሳቁስ ዕርዳታ ማድረጋቸው የሚበረታታ መሆኑን ገልጸዋል።
 
በሌላ በኩል ለሽግግር መንግሥት ምስረታ መሟላት ያለባቸው ቅድመ ሁኔታዎች ተሟልተው አለመገኘታቸው እና የክልሎች ድንበር አለመካለል በክፍተትነት ተነስተዋል፡፡
 
ከዚህ ባለፈ የፀጥታ ሁኔታ በተሟላ መልኩ ለመፈፀም ተጨማሪ ጊዜ ማስቀመጥና የሚከናወኑ ተግባራትን በቁርጠኝነት መፈፀም አስፈላጊ መሆኑን ገልፀዋል ።
 
የምክክር ስብሰባዉ በነገው ዕለት በሚካሄደው ኢጋድ የሚኒስትሮች ስብሰባ የሚጠናቀቅ መሆኑን ከውጪ ጉዳይ ሚኒስትር ቃል አቀባይ ፅህፈት ቤት ያገኘነው መረጃ ያመለክታል።

Share this post

Post Comment

This site uses Akismet to reduce spam. Learn how your comment data is processed.