አብን የክልል እና የፌደራል ፓርላማ ተመራጭ እጩዎችን በመመልመል ላይ መሆኑን አስታወቀ።

Source: https://mereja.com/amharic/v2/171923

( ኢትዮ ኤፍ ኤም ) – የአማራ ብሄራዊ ንቅናቄ (አብን) ለቀጣዩ ምርጫ የምርጫ ማኔፊስቶ ከማዘጋጀት ጀምሮ የክልል እና የፌደራል ፓርላማ ተመራጭ እጩዎችን በመመልመል ላይ መሆኑን አስታወቀ።
የሃገሪቷ የሰላም ሁኔታ በእንቅስቃሴያችን ላይ ተጽዕኖ ቢፈጥርብንም ለምርጫው ግን እየተዘጋጀ መሆኑንም ፓርቲው አስታውቋል ፡፡
የቀጣዩን ሃገራዊ ምርጫ ዝግጅት በማስመልከት ኢትዮ ኤፍ ኤም ካነጋገራቸው የፖለቲካ ፓርቲዎች ውስጥ የአማራ ብሄራዊ ንቅናቄ (አብን) አንዱ ነው፡፡

ፓርቲው በሃገር አቀፍ ደረጃ እንደሚወዳደር የነገሩን የፓርቲው ሊቀ መንበር ዶ/ር ደሳለኝ ጫኔ፤ በሃገሪቷ አንዳንድ አካባቢዎች ያለው አለመረጋጋት የፖለቲካ ስራችንን ለማከናወን የፈጠረብን ተጽእኖ ቀላል አይደለም ብለውናል፡፡
እስካሁን በነበረው ጊዜ ፕሮግራሞቻችንን ለህዝቡ ለማስተዋወቅና ለምርጫው በሙሉ አቅማችን እንዳንዘጋጅ እነዚህ የጸጥታ ጉዳዮች ገድበውን ቆይተዋል፤ሆኖም ከዚህ በኋላ ግን ትኩረታችንን ምርጫው ላይ እናደርጋለን ሲሉ ነግረውናል፡፡
የፓርቲው በርካታ አባላት ከሰኔ 15ቱ ሁነት ጋር በተያያዘ ለእስር መዳረጋቸው የሰው ሃይላችሁ እንዲመናመንና ፓርቲያችሁ እንዲዳከም አላደረገውም ወይ ስንል ጠይቀናቸዋል፡፡
“የአባሎቻችንን መታሰር አጥብቀን የምንቃወመውና ጫና ያደረገብን ጉዳይ ቢሆንም የፓርቲያችንን መሰረት የሚያናጋ ግን አይደለም ፤አብን በርካታ አባላት አሉት አላማችንም ትልቅ ነው” ብለውናል፡፡
የምርጫ ማኒፌስቶ በማዘጋጀት ዝርዝር ፖሊሲዎችንና ፕሮግራሞችን ማውጣት፤ለክልል ምክር ቤትና ለፌዴራል ፓርላማ እጩ የሚሆኑ አባላትን በማጣራት ማቅረብ ፓርቲው በቀጣይ የሙሉ ጊዜ ስራው አድርጎ የሚሰራባቸው ጉዳች መሆናቸውንም ዶ/ር ደሳለኝ ተናግረዋል፡፡

Share this post

Post Comment

This site uses Akismet to reduce spam. Learn how your comment data is processed.