ኮተቤ ሜትሮፖሊታን ዩኒቨርሲቲ በዓለም አቀፍ የዩኒቨርሲቲዎች እግር ኳስ ውድድር ላይ ሊሳተፍ ነው

Source: https://fanabc.com/2019/01/%E1%8A%AE%E1%89%B0%E1%89%A4-%E1%88%9C%E1%89%B5%E1%88%AE%E1%8D%96%E1%88%8A%E1%89%B3%E1%8A%95-%E1%8B%A9%E1%8A%92%E1%89%A8%E1%88%AD%E1%88%B2%E1%89%B2-%E1%89%A0%E1%8B%93%E1%88%88%E1%88%9D-%E1%8A%A0/

አዲስ አበባ፣ ጥር 4፣ 2011(ኤፍ.ቢ.ሲ) ኮተቤ ሜትሮፖሊታን ዩኒቨርሲቲ ቻይና በምታዘጋጀው ዓለም አቀፍ የዩኒቨርሲቲዎች እግር ኳስ ውድድር ላይ የአፍሪካ ዩኒቨርሲቲዎችን በመወከል በውድድሩ ይካፈላል ተባለ።

በቀጣዩ ዓመት በህዳር ወር ቻይና ለመጀመሪያ ጊዜ ዓለም አቀፍ የዩኒቨርሲቲዎች እግር ኳስ ውድድር እንደምታዘጋጅ የኢትዮጵያ ዩኒቨርሲቲዎች ስፖርት ማህበር ፕሬዝዳንት አቶ አባይ በላይሁን ጠቅሰዋል፡፡

የአፍሪካ ስፖርት ማህበር ባለፈው ዓመት ሰኔ ወር መቀሌ ላይ ባዘጋጀው 9ኛው የአፍሪካ ዩኒቨርሲቲዎች እግር ኳስ ውድድር ላይ 26 የአፍሪካ ዩኒቨርሲቲዎች ተሳትፊ እንደነበሩ አስታውሰዋል።

በዚሁ ውድድር ኮተቤ ሜትሮፖሊታን ዩኒቨርሲቲ አሸናፊ በመሆኑ በዓለም አቀፍ ደረጃ በሚዘጋጀው መድረክ የአፍሪካ ዩኒቨርሲቲዎችን በመወከል በቀጥታ ይሳተፋል ፡፡

የመቀሌ ዩኒቨርሲቲ መምህርና የኢትዮጵያ ዩኒቨርሲቲዎች ስፖርት ማህበር ምክትል ፕሬዝዳንት ዶክተር ከሳቴ ለገሠ በበኩላቸው ኮተቤ ሜትሮፖሊታን ዩኒቨርሲቲ በውድድሩ ውጤታማ ለመሆን በቅርቡ ልምምድ እንደሚጀምር ገልጸዋል፡፡

ወጪው ሙሉ በሙሉ በአፍሪካ ዩኒቨርሲቲዎች ስፖርት ማህበር የሚሸፈን ሲሆን፥ ተወዳዳሪዎችም በአካላዊ ብቃት፣ በቴክኒክና በስነ-ልቦና ብቁ እንዲሆኑ ማህበሩ የቴክኒክ ድጋፍ እንደሚያደርግ ተናግረዋል፡፡

 

ምንጭ፦ኢዜአ

Share this post

Post Comment

This site uses Akismet to reduce spam. Learn how your comment data is processed.