የሲዳማ ህዝበ ውሳኔ የድምፅ አሰጣጥ በሰላም እንዲጠናቀቅ ቅድመ ዝግጅት ተደርጓል

Source: https://fanabc.com/2019/11/%E1%8B%A8%E1%88%B2%E1%8B%B3%E1%88%9B-%E1%88%85%E1%8B%9D%E1%89%A0-%E1%8B%8D%E1%88%B3%E1%8A%94-%E1%8B%A8%E1%8B%B5%E1%88%9D%E1%8D%85-%E1%8A%A0%E1%88%B0%E1%8C%A3%E1%8C%A5-%E1%89%A0%E1%88%B0%E1%88%8B/

አዲስ አበባ፣ ህዳር 8፣ 2012 (ኤፍ.ቢ.ሲ) የሲዳማ ህዝበ ውሳኔ የድምፅ አሰጣጥ ሂደት በሰላም እንዲጠናቀቅ ቅድመ ዝግጅት መደረጉን የሀዋሳ ከተማ እና ሲዳማ ዞን የፀጥታ መምሪያዎች አስታውቀዋል።

መምሪያዎቹ የፊታችን ረቡዕ የሚካሄደውን የሲዳማ ህዝበ ውሳኔ አስመልክተው በዛሬው ዕለት ጋዜጣዊ መግለጫ ሰጥተዋል።

በመግለጫውም ከጥቅምት 27 እስከ ህዳር 6 ቀን 2012 ዓ.ም የተደረገው የመራጮች ምዝገባ ሠላማዊ ሆኖ መጠናቀቁ ተመላክቷል።

ስለሆነም መራጮች ምንም አይነት ስጋት ሳይገባቸው በነፃነት የፈለጉትን ምልክት እንዲመርጡ ጥሪ ተላልፏል።

የሲዳማ ዞን ሠላም እና ፀጥታ መምሪያ ሀላፊ አቶ አለማየሁ ጢሞቲዎስ፥ በዕለቱ የተለያዩ የመንግስት እና የንግድ ተቋማት አገልግሎት የማይሰጡ መሆኑን በማስታወስ መራጮች ያለምንም ስጋት ሙሉ መብታቸውን እንዲጠቀሙ ጥሪ አቅርበዋል።

በተጨማሪም ከነገ ምሽት12 ሰዓት ጀምሮ እስከ ዓርብ ማለዳ ድረስ በሃዋሳ ከተማ እና የሲዳማ ዞን የሁለት እግር ሞተር ተሽከርካሪ አገልግሎት የተከለከለ መሆኑን ተናግረዋል።

የሀዋሳ ከተማ ሳላም እና ፀጥታ ጽህፈት ቤት ሃላፊ ኮሎኔል ሮደሞ ኪኣ በበኩላቸው፥ ህብረተሰቡ በምርጫ ሂደቱ የፀጥታ ችግር ሲመለከት በአቅራቢያው ለሚገኙ የፀጥታ አካላት ጥቆማ በመስጠት ሰላምን ለማረጋገጥ የሚደረገውን ጥረት እንዲያግዝ ጠይቀዋል።

ህዝበ ውሳኔዉን ተከትሎ ማንኛውም ህጋዊ ያልሆነ የድጋፍ እንዲሁም የተቃውሞ ሰልፍ ማካሄድ የተከለከለ ነው ተብሏል።

 

በአፈወርቅ አለሙ

Share this post

Post Comment

This site uses Akismet to reduce spam. Learn how your comment data is processed.