የግብርና ሜካናይዜሽን መሳሪዎች ከቀረጽ ነጻ ሆነው እንደሚገቡ ይፋ ሆነ

Source: https://fanabc.com/2019/12/%E1%8B%A8%E1%8C%8D%E1%89%A5%E1%88%AD%E1%8A%93-%E1%88%9C%E1%8A%AB%E1%8A%93%E1%8B%AD%E1%8B%9C%E1%88%BD%E1%8A%95-%E1%88%98%E1%88%B3%E1%88%AA%E1%8B%8E%E1%89%BD-%E1%8A%A8%E1%89%80%E1%88%A8%E1%8C%BD/
አዲስ አበባ ፣ ታህሳስ 4 ፣ 2012 (ኤፍ ቢ ሲ) 624 አይነት የግብርና ሜካናይዜሽን መሳሪዎች ከቀረጽ ነጻ ሆነው የሚገቡ መሆኑን የግብርና ሚኒስቴር አስታወቀ።
 
የግብርና የሚኒስቴር መስሪያ ቤቶች እና የክልል ከፍተኛ አመራሮች፣ ዳይሬክተሮች፣ የግል ባለሀብቶች እንዲሁም ሌሎች ባለድርሻ አካላት በዛሬው ዕለት በአዳማ ከተማ ተወያይተዋል።
 
በዚህ ወቅትም በአይነት 624 ያህል የግብርና ሜካናይዜሽን መሳሪዎች ከቀረጽ ነጻ ተደርገው የሚገቡ መሆኑን የግብርና ሚኒስትር አቶ ዑመር ሁሴን ይፋ አድርገዋል።
 
በሜካናይዜሽን መሳሪያዎች ላይ በመንግስት የተደረገው የታክስ እፎይታ አሁን ያለውን ከ10 በመቶ ያልበለጠ የግብርና ሜካናይዜሽን ተደራሽነት ከፍ የሚያደርግ መሆኑ ተመላክቷል።
 
ከታክስ ነጻ የተደረጉት የሜካናይዜሽን መሳሪያዎች አርሶ አደሩ የሚፈልጋቸውን ግብዓቶች በአይነት፣ በመጠንና በጥራት በማቅረብ ከእርሻ ዝግጅት እስከ ሰብል አሰባሰብ ጥቅም ላይ በማዋል የአርሶ አደሩንና የባለሃብቱን ህይወት ለመቀየር የሚያስችል መሆኑን ሚኒስትሩ ተናግረዋል።
 
በተጨማሪም ከመሳሪያዎቹ የግዥ ስርዓት ባሻገር ከእርሻ ዝግጅት ጀምሮ ማጨድ፣ ማጓጓዝ፣ መውቃት እና ሌሎች አገልግሎቶች አሰጣጥም ከታክስ ነጻ እንደሚሆኑ የግብርና ሚኒስቴር የግብርና ሜካናይዜሽን ዳይሬክተር አቶ ታምሩ ሀብቴ ገልጸዋል።
 
ከታክስ ነጻ ተደርገው የሚገቡት እነዚህ ዘመናዊ መሳሪያዎችም የተማረው ወጣት በግብርናው ዘርፍ እንዲሰማራ በማድረግ በዕውቀት ላይ የተመሰረተ የስራ ዕድል እንዲፈጠርለት የሚያስችሉ መሆናቸውን ከሚኒስቴሩ ያገኘነው መረጃ ያመላክታል።

Share this post

Post Comment

This site uses Akismet to reduce spam. Learn how your comment data is processed.