ጠ/ሚ ዶ/ር ዐቢይ የኖቤል የሰላም ሽልማትን ማግኘታቸው ኢትዮጵያ በውጭ አለም ያላትን ተቀባይነት ያሳድጋል-የፖለቲካ ምሁራን

Source: https://fanabc.com/2019/12/%E1%8C%A0-%E1%88%9A-%E1%8B%B6-%E1%88%AD-%E1%8B%90%E1%89%A2%E1%8B%AD-%E1%8B%A8%E1%8A%96%E1%89%A4%E1%88%8D-%E1%8B%A8%E1%88%B0%E1%88%8B%E1%88%9D-%E1%88%BD%E1%88%8D%E1%88%9B%E1%89%B5%E1%8A%95-%E1%88%9B/
አዲስ አበባ ፣ ታህሳስ 1 ፣ 2012 (ኤፍ ቢ ሲ) ጠቅላይ ሚኒስትር ዶክተር አብይ አህመድ የ2019 የኖቤል የሰላም ተሸላሚ መሆናቸው ኢትዮጵያ በውጭ አለም ያላትን ተቀባይነት እንደሚያሳድግ የፖለቲካ ምሁራን ገለፁ።
 
ፋና ብሮድካስቲንግ ኮርፖሬት ከፕሮፌሰር መረራ ጉዲና፣ ዶክተር ደሳለኝ ጫኔ እና አቶ ሌንጮ ለታ ጋር ቆይታ አድርጓል፡፡
 
ሽልማቱ ኢትዮጵያ ስሟን በአለም አደባባይ ከፍ ያደረገ እና የዜጎቿንም ክብር የጨመረ መሆኑን ፕሮፌሴር መረራ ጉዲና ይናገራሉ፡፡
 
ለዚህ የውጭ እውቅናም በሃገር ውስጥ ያሉ ችግሮችን በመፍታት መደገም እንደሚኖርበትም ገልፀዋል።
 
በመሆኑም ኢትዮጵያ በውጭም ሆነ በሃገር ውስጥ ያላትን ተጽህኖ ፈጣሪነት ሚዛናዊ ለማድረግ የቤት ስራዎችን ማከናውን ይገባታልም ብለዋል፡፡
 
ሌላኛው ፖለቲከኛ ዶክተር ደሳለኝ ጫኔ የጠቅላይ ሚኒስትር ዶክተር አብይ አህመድ የኖቤል ሰላም ተሸላሚ መሆን ቱሩፋቱ ለኢትዮጵያ መሆኑን ያነሳሉ።
 
በኢትዮጵያና ኤርትራ መካከል ተፈጥሮ የቆየውን የጭንቀት ጊዜ ለመቋጨት ለተወሰደው ወሳኝ እርምጃ የተሰጠ ዕውቅ መሆኑን ተናግረዋል፡፡
 
ዶክተር አብይ ወደ ስልጣን ከመጡ በኋላ ላሳዩት መልካም ተስፋ ሰጪ እርምጃዎች እና ላከናውኗቸው ትልልቅ ስራዎች ትኩረት የሰጠም ነው ብለዋል።
 
ሁሉም የፖለቲካ ሀይል የዜጎችን ስኬት በመልካም ጎን መመልከት ይኖርበታል የሚሉት ዶክተር ደሳለኝ ጫኔ በልሂቃን በኩል ልዩነቶች ቢኖሩም የጋራ የሚያደርጉ በርካታ ጉዳዮች አሉ ነው ያሉት፡፡
 
አቶ ሌንጮ ለታ በበኩላቸው ሀገሪቱ ውስብስብ የፖለቲካ ሁኔታ ውስጥ የምትገኝ ቢሆንም አለም በሚከናወኑ ተግባራት ላይ ተስፋዎች እንዳለው ያመላክታል ብለዋል።
ለዚህም ጠቅላይ ሚኒስትር ዶክተር አብይ አህመድ በሃገር ውስጥ በርካታ የጀመሯቸው ጉዳዮች ስለመኖራቸው የሚናገሩት አቶ ሌንጮ ለታ ስለኢትዮጵያ መጻዬ እጣ ፋንታ ሁላችን ተወያይተን መስማማት አለብን ሲሉ ይናገራሉ፡፡
መስማማት አለብን ሲባልም የሁሉም ፍላጎት ይመለሳል ማለት አይደልም ያሉት አቶ ሌንጮ ሰጥቶ መቀበልን ፖለቲከኞች መልመድ አለብን ብለዋል፡፡
ይሄ ከሆነም ወደ ዲሞክራሲያዊ ስርዓት የመሸጋገር ሂደቱ ፈጣን እንደሚሆን እና ለዚህም ሁሉም ርብርብ ማድረግ እንደሚኖርበት አሳስበዋል፡፡
 
 
በበላይ ተስፋዬ

Share this post

Post Comment

This site uses Akismet to reduce spam. Learn how your comment data is processed.