ፕሬዚዳንት ሳህለወርቅ ዘውዴ ከኦስትሪያው መራሄ መንግስት ሰባስቲያን ከርዝ ጋር ተወያዩ

Source: https://fanabc.com/2018/12/%E1%8D%95%E1%88%AC%E1%8B%9A%E1%8B%B3%E1%8A%95%E1%89%B5-%E1%88%B3%E1%88%85%E1%88%88%E1%8B%88%E1%88%AD%E1%89%85-%E1%8B%98%E1%8B%8D%E1%8B%B4-%E1%8A%A8%E1%8A%A6%E1%88%B5%E1%89%B5%E1%88%AA%E1%8B%AB/

አዲስ አበባ፣ ህዳር 27፣ 2011 (ኤፍ.ቢ.ሲ) ፕሬዚዳንት ሳህለወርቅ ዘውዴ በኢትዮጵያ ይፋዊ የስራ ጉብኝት በማድረግ ላይ የሚገኙትን የኦስትሪያ መራሄ መንግስት ሰባስቲያን ከርዝን ተቀብለው አነጋገሩ።

በውይይታቸውም የኢትዮጵያና ኦስትሪያ ግንኙነት ለረጅም ዓመታት የቆየና ታሪካዊ መሆኑን መጥቀሳቸውን የፕሬዚዳንት ጽህፈት ቤት አስታውቋል።

ፕሬዚዳንት ሳህለወርቅ ዘውዴ በውይይቱ ላይ “በኢትዮጵያ መዋዕለ ንዋያቸውን ማፍሰስ ለሚፈልጉ ኢትዮጵያ ብዙ ነገር አላት፤ ግንኙነታችንን የበለጠ ለማሳደግ ደግሞ ትክክለኛው ጊዜ አሁን ነው ብለዋል።

የቻንስለሩ ጉብኝት በሁለቱ ሀገራት መካከል ያለውን መልካም ግንኙነት የሚያሳይ ነው ሲሉም ፕሬዚዳንቷ ተናግረዋል።

የኦስትሪያ መራሄ መንግስት ሰባስቲያን ከርዝ በበኩላቸው፥ “በሁለታችን መካከል ያለው የልማት ትብብር በጥሩ ሁኔታ ላይ የሚገኝ ነው፤ ከዚህም በላይ ግን የኢኮኖሚ ትብብራችንን ማጠናከር ይኖርብናል” ብለዋል።

ይህ ሲሆን ነው ግንኙነታችንን አስተማማኝ ደረጃ ላይ የሚደርሰው ሲሉም ተናግረዋል።

ይህን የሚያጠናክር ሀሳብ ያንጸባረቁት ፕሬዝዳንት ሳህለወርቅ ዘውዴ፤ የኢኮኖሚ ትብብሩ መጠናከር ዋጋው ብዙ መሆኑን ተናግረዋል።

Share this post

Post Comment

This site uses Akismet to reduce spam. Learn how your comment data is processed.